Friday, January 18, 2013

Carol Ann Duffy - Valentyn




Valentyn
Carol Ann Duffy

Nie 'n rooi roos of 'n hart van satyn.

Ek gee jou 'n ui.
Dit is 'n maan toegedraai in bruin papier.
Dit belowe lig
soos die versigtige onthulling van liefde.

Hier.
Dit sal jou verblind met trane
soos 'n minnaar.
Dit sal jou weerkaatsing
'n foto maak wiegelend van smart.

Ek probeer die waarheid te vertel.

Nie 'n oulike kaartjie of soen-o-gram.

Ek gee jou 'n ui.
Sy vurige soen sal aan jou lippe bly kleef,
besitlik en getrou
soos ons is,
vir so lank as wat ons  is.

Vat dit.
Sy platinumringe krimp tot 'n trouring,
as jy so daarna kyk.
Noodlottig.
Sy geur sal aan jou vingers kleef,
kleef aan jou lem.

[Vertaal deur Johann de Lange]

Tuesday, January 15, 2013

Ruth L. Schwartz - O God, fok my

Ruth L. Schwartz


O God, fok my
Ruth L. Schwartz

Fok my, o God, met gewone dinge,
die dinge in hierdie wêreld wat U die liefste het –

soos bome in die lente, wat hulleself ontbloot,
glimpse van blaarknoppe wys so ferm en geswolle

dat ek wil hulle in my mond wil neem.
Van bome gepraat, fok my met voëls,

sê maar, ’n enorme skor kraai,
trots soos ’n man met sy hand in sy onderbroek,

en dan ’n spreeu, intiem, bruin,
diskreet en omsigtig soos ’n bywyf.

Fok my met my kombuiskraan, druppend
soos ’n nimfomaniak,

die heelnag deur, voller en voller,
tot dit by die borde in die wasbak oorloop –

en met die buurman onder my se stofsuier,
daardie groot suigende lawaaierige draak

wat alles wat vuil is laat skoonkom.
Fok my met ontbyt, met Engelse roosterkoekies,

die gees van die deeg opgewerk
met 'n bruin kors, deurgloei van gebotter wees.

Fok my met lemoensap,
die gekonsentreerde soetheid daarvan,

wat die mond verruk soos somer,
en soet skuimvlokkies agterlaat soos spoeg

aan die binnekant van die glas.
Fok my met koffie, sterk en warm,

en dan met room by die koffie gevoeg,
wat blom soos sampioenwolke,

en oopgaan soos valskerms.
Fok my met die tikkende

horlosie, wat die tikkende
bom is, wat die tikkende hart is –

die hart wat ons hoor in die eerste maande,
in die oorspronklike naaktheid,

voordat ons jillende gebore word.
Fok my met die ongewaste lepel

trots met sy koffievlek –
die vae draaikolk van ’n bruikbare lewe

saamgespoel in die middel, rond soos ’n wêreld.

[Vertaal deur Johann de Lange]

Saturday, January 12, 2013

Ekfrasis



Hieronymus Bosch

Hieronder is 'n lys van ekfrastiese verse wat deur die webblad Skoppensboer begin is, & wat ek verder bygewerk het. Sommige inskrywings het weggeval omdat hulle nie strenggesproke aan die vereistes van die ekfrastiese gedig (gedig gebaseer op 'n ander visuele kunswerk) voldoen het nie, maar heelwat het bygekom.

Ek wil digters & lesers wat van verse weet wat nie op hierdie lys is nie vra om sulke verse asseblief onder my aandag te bring. Veral bundels wat die afgelope jare verskyn het, moet ek nog deurwerk. Die inligting wat verstrek moet word is:

1. Bundel waaruit die gedig kom
2. Uitgewer & jaar van publikasie
3. Gedigtitel & bladsynommer
4. Kunswerk waarop die gedig gebaseer is

Stuur asseblief julle inligting aan johnnypanic666@openweb.co.za.

Dankbaar by voorbaat,

Johann de Lange

Kyk hier na die huidige lys, & hou julle oë oop vir 'n blog oor ekfrastiese gedigte met teorie & geskiedenis van die vorm, sowel as treffende voorbeelde.

Kaapse Paragrawe. Ekfrasis, oftewel 'Die Beeldgedig in Afrikaans'

Tadeusz Rózewicz - Twee verse

Tadeusz Rózewicz


Proewe
Tadeusz Rózewicz

Die dood sal nie ’n enkele
versreël korrigeer nie
sy is nie ’n proefleser nie
sy is nie ’n simpatieke
redakteur nie

’n swak metafoor is tydloos

’n slordige digter wat dood is
is ’n slordige dooie digter

’n vervelige ou verveel ook nadoods
’n sot hou aan met sy sotlike geklets
van anderkant die graf

[Vertaal deur Johann de Lange na die vertaling van Adam Czerniawski]

***


By al my ander verpligtinge
Tadeusz Rózewicz

By al my ander verpligtinge
almal dringend
het ek vergeet hoe
noodsaaklik dit is
om ook te sterwe

heel ligsinnig
het ek hierdie verpligting verwaarloos
of ek het dit vervul
maar net oppervlakkig

beginnende more
gaan dinge verander
ek sal toegewyd begin sterf
wys optimisties
sonder om ’n oomblik te verkwis

[Vertaal deur Johann de Lange na die vertaling van Magnus J. Krynski & Robert A. Maguire]

Thursday, January 10, 2013

Seamus Heaney - Die muishond


Die muishond
Seamus Heaney

Orent, gestreep en gedamasseer soos die altaargewaad
by 'n dodemis, paradeer die muishond se stert
die muishond. Nag na nag
het ek haar verwag soos 'n besoeker.

Die yskas het runnikend stil geraak.
My lessenaarlamp se lig was sagter anderkant die veranda.
Klein lemoene het gegloei aan die lemoenboom.
Ek het gespanne begin raak soos 'n voyeur.

Na elf jaar het ek weer liefdesbriewe
begin skryf, die woord ‘gade’ geopper
soos 'n bewaarde kuip, asof die slank vokaal
muteer het in die nag-aarde en lug

van Kalifornië. Die lieflike, nuttelose
geur van bloekoms het jou afwesigheid uitgespel.
Die nasmaak van 'n mondvol wyn
was soos om jou in te adem van 'n koue kussing.

En daar was sy, die aandagtige en verleidelike,
ordinêre, misterieuse muishond,
gemitologiseer, gedemitologiseer,
snuiwend aan die planke vyf voet van my af.

Ek het dit alles weer onthou laasnag, geroer
deur die roetstuiwing van jou naggoedjies teen slapenstyd,
jou kop-onderstebo, agterstewe na bo soektog in die onderste laai
na die swart nagrok met die diep halslyn.

[Vertaal deur Johann de Lange]