John Berryman
Gebed aan God
John
Berryman
Meester van skoonheid, vakman van die sneeuvlok,
onnabootsbare beramer,
skenker van Aarde so oorlaai & anders as die
saai Maan,
dankie vir dié my gawe.
Ek het ’n oggendgebed aan U geskryf
wat met sorg en presisie alles omvat wat tel.
“Volgens U wil” begin die ding.
Dit het my aan & af twee dae gevat. Dit streef
nie na welsprekendheid nie.
U het tot my redding gekom keer op keer
in my onbegaanbare, soms wanhopende jare.
U het my begaafde vriende hulleself laat vernietig
en ek is steeds hier, erg beskadig, maar in
werkende toestand.
Onkenbaar, soos ek onkenbaar is vir my proefkonyne:
Hoe kan ek U “liefhê”?
Slegs so ver as dankbaarheid & ontsag
gaan ek vol vertroue & absoluut.
Ek het geen idee of ons weer lewe nie.
Dit lyk nie waarskynlik nie
nóg vanuit die wetenskaplike nóg vanuit die
filosofiese oogpunt
maar alles is sekerlik moontlik vir U,
en ek glo so vas in die Opstanding-verskynings aan
Petrus en aan Paulus
soos ek glo dat ek in hierdie blou stoel sit.
Maar dit kon ’n spesiale geval gewees het
om hulle aanvanklike geloof te vestig.
Wat ook al U einde mag wees, aanvaar my ontsag.
Mag ek staan tot die dood toe vir ewig op aandag
vir elke greintjie van selfs U geringste onderrig
of insig.
Ek voel selfs seker dat U my weer sal bystaan,
Meester van insig & skoonheid.
[Vertaal deur Johann de Lange]
